السلعة

الجمعة، 25 أكتوبر 2013

[ دروس تصوير ] – سرعة الغالق

[ دروس تصوير ] – سرعة الغالق

[ دروس تصوير ] الدرس رقم ٢ – سرعة الغالق





سرعة الغالق

أسماء أخرى
وقت التعريض٬ سرعة الغالق٬ shutter speed -  شتر سبييد
سرعة الغالق  يتم التحكم بها من الكاميرا ويعتبر أحد مواصفات الكاميرا
يعني إذا جيت تشتري كاميرا بتحصله موجود في أحد الخيارات
بس إذا جيت تشتري عدسة ما تسأل عن وقت التعريض أو سرعة الغالق حقها أو الشتر حقها كم !! بيجيك اللي في المحل ويقول وش يبي ذا !!
دائماً تحصله مابين ١/٤٠٠٠ إلى ١٥ أو ٣٠ ثانية – بس ترا هالشيء موجود في ٩٥٪ من الكاميرات وكلها تتشابه في المدى هذا
بنفهم مع بعض أكثر بعد شوي.

وقت التعريض ٬ ياشين الترجمة
اسمه في الأساس اكسبوجر تايم
Exposure Time
بس أنا بسميه الشتر سبيد أو الشتر لحاله بعد
الشتر هو الوقت اللي يفتح فيه الغالق ويسمح بمرور الضوء ويقفل عليه داخل الحساس
كلام كأنه طلاسم… إلا طلاسم
والله عارف ٬ حتى أنا ما فهمت
بس خلونا نتخيل مع بعض
في باب داخل الكاميرا يفتح ويصك بسرعة
وفيه واحد متخبي ورى هالباب يبي يشوف اذا انفتح الباب وبيلقط أي شيء تطيح عليه عينه
الباب هو الغالق
أبو الشباب اللي متخبي هو الحساس
وسرعة فتح الباب وتسكيره هو الشتر سبيد
شكل الغالق في الكاميرا ؟
قلنا لكم باب .. بس باب شكله يختلف شوي
Shutter HD [ دروس تصوير ] الدرس رقم ٢   سرعة الغالق

وش يرمز للشتر ؟
يرمز له بالثواني بشكل عام
يعني ١/١٠٠ ثانية (معناها الغالق بيفتح وبيسكر في جزء من ١٠٠ جزء من الثانية)
١/٦٠ ثانية (معناها الغالق بيفتح وبيسكر في جزء من ١٠٠ جزء من الثانية)
١/٤ ثانية أو ربع ثانية (معناها الغالق بيفتح وبيسكر في ربع ثانية)
١” ثانية (معناها الغالق بيفتح وبيسكر بعد ثانية)
١٠ ثواني (معناها الغالق بيفتح وبيسكر بعد ١٠ ثواني)
… الخ

وين أشوف الغالق أو الشتر سبيد في الكاميرا ؟
الشتر سبيد موجود على شاشة الكاميرا
ويعذرونا مستخدمين سوني وفوجي وباناسونيك ما حطينا لهم مثال
shutter2 [ دروس تصوير ] الدرس رقم ٢   سرعة الغالق
الرقم ٦٠ معناها ١/٦٠
بس اذا طلع لنا رقم زي ٤” أو ٢” ،،، معناها انه ٤ ثواني أو ثانيتين

تأثيير الشتر على الصورة
يأثر الشتر سبيد أو سرعة الغالق على الصورة في شغلتين
١- كمية الإضاءة ـ وهذا شيء مشترك في كل عوامل مثلث التعريض
٢- تثبيت الحركة
كل ما كانت سرعة الغالق أسرع كل ما كان الضوء اللي يدخل أقل
وكل ما كانت سرعة الغالق بطيئة كل ما زاد الضوء اللي يدخل للحساس
يعني
لو صورنا صورة والغالق ١ ثانية
وصورة ثانية الغالق ٤ ثواني
اللي بتكون إضاءتها أكثر هي الصورة أم ٤ ثواني
مثال ثاني
لو صورنا صورة والغالق ١/١٠٠
وصورة ثانية الغالق فيه ١/٢٠
اللي بتكون إضاءتها آكثر هي الصورة أم ١/٢٠
بيجي واحد الحين مطفي النور ويقول .. أجل بخليها دائما أبطأ شيء
طبعاً لا
ليه ؟
أول شيء .. يمكن أبطأ شيء يكون إضاءة زايدة
وكلنا في التصوير ندور إضاءة موزونة
بيجي خوينا المطفي ويقول .. أجل بخليها دائما أبطأ شيء موزون
طبعاً لا .. مرة ثانية
ليه ؟
فوق قلنا .. سرعة الغالق تساعد في تثبيت الحركة
والحركة نوعين .. حركة الكاميرا وحركة الجسم المصور
لو خلينا سرعة الغالق على ١٠ ثواني وجينا نصور طفل أو واحد يلعب كورة .. بتكون النتائج جداً سيئة
لأنه خلال فتحة الغالق وتسكيرته .. محد ثابت لك
حتى لو استخدمت حامل
لأن الحامل يثبت الكاميرا ما يثبت الجسم المصور
يمكن هالصورة توضح موضوع الحركة
shutter9 [ دروس تصوير ] الدرس رقم ٢   سرعة الغالق

طيب كم السرعات المعروفة والمستخدمة دائماً ؟
مافيه .. يعتمد على بزرانكم وتجربتك الخاصة
الأشخاص اللي جالسين ويتكلمون ..وفيه احتمالية حركة يد بسيطة
نستخدم معهم  سرعة غالق ماتقل عن ١/٤٠
واذا الحركة أكثر
نزيد السرعة ونستخدم ١/٦٠ أو ١/٨٠
إذا الدعوة مطامر وركض نستخدم ١/١٦٠ أو ١/٢٠٠
فيه أحيان كثيرة نبي نصور اللي قدامنا وتطلع الصورة مهزوزة
ويكون اللي قدامنا متصنم وما يتحرك أو انه هو من جد ما يتحرك زي وردة/عطر/عمارة
بس مع كذا تطلع الصور مهزوزة
والمصور عارف ان الاهتزاز صار بسبب حركة يده
الحل وقتها انه يالمصور ستخدم حامل أو يعدل في العنصرين الثانين من عناصر مثلث التعريض
يا فتحة العدسة أو الآيزو وبيتم شرح كل واحد لحاله إن شاء الله

 مقلوب البعد البؤري
أحياناً يكون المصور يصور صورة بسرعة غالق ١/١٠٠ وتطلع الصور مهزوزة.. مع انه قاعد يصور جدار !!
مستحيل الجدار يتحرك ومستحيل اهتزاز اليد يأثر !
وين الاهتزاز صار أجل ؟
نروح نسأل المصور عن العدسة اللي استخدم وأكيد بنلقاه يستخدم عدسة تيلي فوتو ( زووم ) وبعدها البؤري مثلاً ٤٠٠ مم
وقتها نقول له الله يخليك ثاني مرة استخدم شتر سبيد أقل شيء ١/٤٠٠
وهذا هو مقلوب البعد البؤري ويهدف الى تجنب اهتزاز الكاميرا نفسها
إذا العدسة بعدها البؤري ١٠٠ نستخدم سرعة غالق ١/١٠٠
إذا البعد البؤري ٥٥ نستخم سرعة غالق ١/٥٥ أو أسرع
إذا البعد البؤري ١٨ نستخدم سرعة غالق ١/١٨ أو أسرع

بحثت في الانترنت عن بعض النماذج اللي اتوقع تساعد في توضيح الفكزة
Shutter3 [ دروس تصوير ] الدرس رقم ٢   سرعة الغالق
نشوف في الصورة اللي فوق كيف تجميد الحركة والسبب استخدام سرعة غالق سريعة جداً وهي جزء من ٢٠٠٠ جزء من الثانية
 الإضاءة كانت طبيعية ( شمس ) وكافية جداً عشان كذا ما ظلمت الصورة

Shutter4 [ دروس تصوير ] الدرس رقم ٢   سرعة الغالق
أنا اعتبر المصور هنا خرج عن المألوف وصور لنا الساعة مع حركة عقرب الثواني.
تقدرون تعرفون الشتر سبيد من عدد المرات اللي وقف فيها العقرب.

Shutter5 [ دروس تصوير ] الدرس رقم ٢   سرعة الغالق
هنا تجميد رائع للحركة

Shutter6 [ دروس تصوير ] الدرس رقم ٢   سرعة الغالق
يمكن هذي تسبب فضول للكثيرين
بس فيه درس خاص عن تصوير الشلالات في الفترة القادمة
المصور براين استخدم شتر سبيد ٤ ثواني عشان الكاميرا تسجل كل الحركات الحاصلة خلال الـ ٤ ثواني
كان يستخدم حامل ثلاثي أكيد والا كان لقينا كل شيء مهتز
في الصورة نفسها .. كل شيء كان ثابت ما عدا الموية
فالكاميرا سجلت حركة الموية مع بقاء الأجسام الثابتة .. ثابتة

طبعا مع زيادة سرعة الغالق راح تظلم الصورة
خصوصاً إذا ما كان عندنا مصدر إضاءة قوي نقدر نتحكم فيه – مثل صورة الفهد
وقتها نبدأ نغير في الخيارات الثانية اللي هي فتحة العدسة أو الحساسية
تابعونا مع الدرس القادم وإن شاء تحصلون الفائدة

فيه سؤال دايما يتردد ..
أبي أصور صورة مهيب مهزوزة بس ما أبغى أغير في الاعدادات كثير
الجواب :
نحط الكاميرا على مود ( أولوية الغالق)
يرمز له في كاميرات كانون بحرف Tv
وفي كاميرات نيكون بالحرف S
Shutter7 [ دروس تصوير ] الدرس رقم ٢   سرعة الغالق
أول ما نحط الكاميرا على هذا المود.. الكاميرا تسوي الإعدادات حقت فتحة العدسة
بس المطلوب منك كمصور تعرف الشيء اللي قدامك وش الغالق اللي يجمده

ليست هناك تعليقات :

إرسال تعليق

شكرا على مشاركتك معنى

Tag Line